దావోస్‌లో సీఎం చంద్రబాబు బిజీబిజీ.. యూఏఈ మంత్రితో కీలక భేటీ

స్విట్జర్లాండ్‌లోని దావోస్‌లో జరుగుతున్న వరల్డ్ ఎకనామిక్ ఫోరం సదస్సులో ఏపీ సీఎం చంద్రబాబు చురుగ్గా పాల్గొంటున్నారు. రాష్ట్రానికి పెట్టుబడులను ఆకర్షించే లక్ష్యంతో ఆయన వివిధ దేశాల మంత్రులు, పారిశ్రామికవేత్తలతో వరుస సమావేశాలతో బిజీగా గడుపుతున్నారు.

ఈరోజు యునైటెడ్ అరబ్ ఎమిరేట్స్ (యూఏఈ) ఆర్థిక, పర్యాటక శాఖ మంత్రి అబ్దుల్లా బిన్ తౌక్ అల్ మర్రితో సీఎం చంద్రబాబు సమావేశమయ్యారు. ఈ భేటీలో ఆహారం, మల్టీ మోడల్ లాజిస్టిక్స్, ఇంధనం, ఓడరేవులు, రిటైల్ వంటి కీలక రంగాల్లో పరస్పర సహకారంపై చర్చించినట్లు ముఖ్యమంత్రి స్వయంగా వెల్లడించారు. ఈ మేరకు తన ఎక్స్ ఖాతాలో సమావేశానికి సంబంధించిన ఫొటోలను పంచుకున్నారు.

ఆదివారం రాత్రి గన్నవరం విమానాశ్రయం నుంచి ప్రత్యేక బృందంతో దావోస్‌కు బయలుదేరిన చంద్రబాబుకు యూరప్‌లోని ప్రవాస తెలుగు వారు, స్విట్జర్లాండ్‌లోని భారత రాయబారి ఘన స్వాగతం పలికారు. ఐదు రోజుల పాటు జరగనున్న ఈ సదస్సులో భాగంగా చంద్రబాబు మరిన్ని సమావేశాల్లో పాల్గొని, ఆంధ్రప్రదేశ్‌లో పెట్టుబడులకు ఉన్న అవకాశాలను వివరించనున్నారు.